走揣夢中看見的彼个聲音
Cháu-chhōe tio̍h bāng-tiong khòaⁿ-kìⁿ ê hit ê siaⁿ-im
看過庄跤的粗俗
Khòaⁿ kòe chng-kha ê chho͘-sio̍k
看過都市的虛華
Khòaⁿ kòe to͘-chhī ê hi-hoa
伸勼佇美麗卻殘酷的世間
Chhun-kiu tī bí-lē khiok chân-khok ê sè-kan
浮沉踮溫暖閣複雜的人海
phû-tîm tiàm un-loán koh ho̍k-cha̍p ê lîn hái
敢講生活佮感情攏無算啥
Kám-kóng seng-oa̍h kap kám-chêng lóng bô sǹg sáⁿ
猶是金錢佮利益閣會用創啥
iá-sī kim-chîⁿ kap lī-ek koh ē-ēng chhòng sáⁿ
雖然生活艱苦 但是咱猶原認真拍拚 親像少年的囡仔
Sui-liân seng-oa̍h kan-khó͘ ,tān-sī lán iu-goân līn-chin phah-piàⁿ,chhin-chhiūⁿ siàu-liân ê gín-á
雖然天公創治 但是咱猶原自由自在 親像天頂的鳥仔
Sui-liân thiⁿ-kong chhòng-tī,tān-sī lán iu-goân chū-iû chū-chāi,chhin-chhiūⁿ thiⁿ-téng ê chiáu-á
雖然透風落雨 但是咱猶原歡喜快樂 親像水底的魚仔
Sui-liân thàu-hong lo̍h-hō͘,tān-sī lán iu-goân hoaⁿ-hí khoài-lo̍k,chhin-chhiūⁿ chúi-té ê hî-á
坐佇門口埕的樹仔跤
Chē tī mn̂g-kháu-tiâⁿ ê chhiū-á kha
唱出希望的歌
Chhiùⁿ-chhut hi-bāng ê koa
希望天公伯有聽
Hi-bāng thiⁿ-kong-peh ū thiaⁿ
載著願望的歌聲
Chài tio̍h goān-bōng ê koa-siaⁿ
踏著沉重的跤步
Ta̍h tio̍h tîm-tāng ê kha-pō͘
毋驚路途敧敧崎崎
M̄ kiaⁿ lō͘-tô͘ khi-khi-kiā-kiā
毋驚生活寂寞孤單
M̄ kiaⁿ seng-oa̍h siok-bo̍k ko͘-toaⁿ
你可能有興趣的文章...
全部留言